Tambareen Fambily an Mix Up massive large up unu self. An propa respek to all listeners pon Tambareen Radio ova Mix Up Yaad (mixupyaad.com).

Straight to di Mix Up:

Ungrateful Wife

A bredda deh wid him woman from high school days. Him get a buss fi go farin an wen him ova deh him go staat do likkle hustling, likkle jugglingÉ.unu know weh mi mean. Di money staat run flushy an him staat spen crazy money pon har. Him buy har a multi-million dollar apartment a Jamaica, fully inna har name, an a shell dung toppa-top carÉan dat fully inna har name too. Shi staat go UWI an a him pay ALL a har school fees. Wen shi done di Bachelor (B.A.), shi go do har M.A. an a him pay fi dat same way. Anyting har mada an fada and other relatives need him pay fi dem.

Eventually him sort out him papers and immediately fly dung an married har and send fi har. When she reach up is a big beautiful house shi roll inna. Him show har di papers fi di house and tell har say him want dem build life together, an like a real married couple dem mus have each oda back wid all properties. Him show har him oda properties dem, cars, houses, an pon all a dem him have har name as co-owna.

Shi eventually get a nice job an a do really well.

Den one day shi say she a go buy a house fi har self, only inna fi har name. Di husband ask har why at dis stage a dem life shi a go buy house only inna har name? She say shi jus waan use fi har money buy fi har tings. Di husband tell har say him nuh like dat. Den him remind har dat him did buy a whole heap a tings fi har inna fi har name only, but dat dem did now a grow togeda to anoda level an dats why since him married har an carry har up him mek sure fi put har name pon everyting, including dem multimillion dollar house. But she say dat did different because wen him did buy di tings dem fi har she did need dem ‹ and dat him nuh need nuttin fram har, soh nuttin nuh wrang if shi goh buy tings fi har self.Shi all tell him say a partly fi him fault why she stay so, because wen shi did deh a Jamaica him did always a buy tings fully inna har name, so now she used to it an waan continue it.

Di husband den ask har if dat mean shi a goh continue buy important high value tings only inna fi har name? She say yes, because fi him name nuh need fi deh pon dem cause him doan need dem!

Di bredda staat pree him wife different, an goh talk to him mada, some oda relatives an some frens bout di mix up. Di whole a dem tell him say him fi careful cause him wife nuh mean him nuh good. Eventually him staat pull weh fram har, an one day outa di blues shi get divorce paypas. Him gi har whole heap a tings fi har self, including a nice house an a nice car, an den lef har.

Shi mussi did awright fi a while cause shi did jus accept di separation. But now shi a rally back fi him an a cause bare trouble wid any woman him talk to. Shi claim seh she have rights ova any woman weh him link wid because dem neva deh bout wen she an him a come fram far. KMT!!

Bwoy, mi have a whole heap a tings weh mi coulda rinse bout da mix up ya. Whole heap!! But space nuh allow mi. But some quick points: she don't love him! Shi simply don' love him. And mi hate people who believe say because you an dem a come fram far, or because dem did do some good fi yuh, dat gi dem di right fi use yuh inna dem selfishniss. Is like if you an dem a come fram far, or if dem do some good fi yuh, den dem own yuh. Di wife fi guweh!! Di bredda did de deh fi har, an him neva lef har out wen him get successful a farin. Him did a try build a partnership wid har, but she did jus hell bent on focusing pon har selfishniss. Soh now shi realise di likes naa run flushy as before a soh shi waan come run een back pon him ting. Shi fi guweh an goh fling har self weh grass nuh grow!

Bless up unu self.

Reach Ragashanti at mixupraga@gmail.com or PO Box 5866, Liguanea PO, Kingston 6.