RSS Feed
Follow us on Twitter
Star YouTube Channel
with Ragashanti
Brap! Brap! Crismus a come mi waan mi Yamaha! No fi real, Crismus a come an all now mi cyaan see nuh propa-propa money a run. Cho! But mi give tanx still, cause life an joy deh ya. Cause unu know seh a me say laugh! Straight!
Propa respek to mi Tambareen Fambily an all a Mix Up an Blenda peeps. An shell-dung greetings to all listeners pon Tambareen Radio ova Mix Up Yaad (mixupyaad.com). Unu respek tun up!!
Fambily, unu memba a docta a farin name 'Kevorkian'? A him help a whole heap a people kill them-self wen dem have terminal illness weh can neva get betta an dem inna crazy pain 24 hours a day. Well, mi get it live seh one woman deh a Ochi weh dem call Ms Kevorkian. Dem call har so because mi hear seh a round 10 man dead aready wen shi an dem a sort out! Yeah! Mi hear seh shi good like dat. A nuh condemn har sitin condemn. A jus di way shi sen on di wuk mek di man dem strain demself to death! Puppa Jeezas! Ms Kevorkian! Mi waan know yuh! Mi say mi waan know yuh! Mi waan know if mi fi avoid yuh or tek a slam fram yuh. Cause mi know yuh couldn't kill me. A woulda mek yuh sing "Gentle Jesus meek and mild." Mi nuh fraid a yuh! So talk up! Awoh.
Awright, unu pree part two a one mix- up weh wi did get fram di Whitehouse area inna Linstead.
Raga wid di mix-up fram Whitehouse, Linstead, weh mi did sen in, yu a say it look like the man a sawt mi out too. Nooo Raga, mi just know dem business. Raga, yuh nuh know seh di gal weh a mind di man wid har daddy money bring police guh a di woman yaad, bout she put ads inna di paypa. Raga, if dat deh gal a did fi mi family shi couldn't live yaa. Mi just sorry fi di woman. Raga, mi n di gal live inna di same lane. A vex mi vex! Di gal ave har gud-gud man weh did a sen har guh school an she leave im fi bad man. Di gal mother don't even like the bwoy. Raga mi a good mix up investigator. Di man did deh wid a hairdresser gal weh ave AIDS. Suh yuh know di ting nuh good. Mi waa mek dem gal deh know seh dem fi guh get a AIDS test, cuz if unu guh breed di pickney might born wid unu disease. Raga mi nuh deal wid deh gal deh, shi n mi sista ave issues. An mi naa stop keep u updated wid dis. Raga, a waa suh bout dat deh Caldina man suh, a bere gal a war ova im. One gud advice to di woman weh ave har man a foreign is to leave di likkle dutty bwoy an be yuhself. All a who a war ova im, mi naa stop write Raga, an tell him unu business. Woman tattoo im name pon dem body an im still lef har. How a gal fi ave a man a mine har an mek nex man a dis har up suh? An di woman ave har man a foreign. One more ting, tell di gal dem fi memba fi guh get tested n stop war. Raga, wen u waa hear bout AIDS, check Linstead an Whitehouse. It deh yaa nuff! Mek dem say mi a fool. A one man mi ave an him use to run di road, but him find out bout dem gal yaa n stop, an sawt out im life. Big up yuhself Raga, mi ave nuff more fi tell yuh wen di baby born.
Hot ya now! Di mix-up dem a tun up inna Linstead! All massive inna Whitehouse ova Linstead big up unu self. A how di gyal dem jus a war ova di Caldina man suh? Gyal all have har good-up good-up man who a mind har like wow and still a draw fi di Caldina man! Missa Caldina Man, a how yuh a guh so haad!! Yuh a real stulla! Yuh have dem weak paadie!
Big up di catty weh har name rhyme wid 'troubles' who cyaan stop tek Missa Caldina. Mi not allowed fi write yuh name yah suh, but yuh know yuh-self. My girl, a how yuh love it suh? Missa Caldina mus a mek yuh talk inna tongues wen yuh unda him strength. Maaawwd!
Big an serious, can smaddy explain to me why so much woman love taxi man an bus man suh? No, fi real yuh have some woman who jus love dash out to bus man an taxi man, an nuff a dem love di drama weh come wid it. Dem mussi jus love fi get a ride wen dem get a ride. Get it? DWL! But a wa really mek so much woman love bus an taxi man suh? Smaddy tell me now!
Reach Ragashanti at mixupraga@gmail.com or PO Box 5866, Liguanea PO, Kingston 6.
