Mix-up big-up to di bredda weh call him bunna gyal fi link up a booty call. Di bunna girl tell him say yes him can fahwud fi di nookie. Di man den call him wife an tell har say him naa guh mek it home early cause while him did on him way in from di country him did get a call weh require him fi return to him office fi deal wid an emergency. Di wife say cool an tell him fi careful an dat him mus come home as soon as him can.

Wen him reach a di bunna gyal apartment him call har an immediately say, "Mi reach. Mi inna di parking lot. Open di door." Di bunna gyal pause and replied "mmm mm". Di man come outa him car an walk up to di bunna girl apartment. Den him notice say shi neva come out. So him knock pon di door. Afta di bunna girl open di door di fus ting fly outa har mout was: "why yuh neva call mi an tell mi yuh reach?" Of course di man den say, "but mi did call you an tell yuh fi open di door an yuh ansa like yuh a come." Di bunna gyal replied, "mi neva get nuh call fram yuh." Same time di two a dem quiet, di man staat sweat, him slowly reach fi him phone, almost like him doan even did waan look pon it. Wen him look pon him phone it confirm di beginning a him nightmare wen him did call back di bunna girl it wasn't she him did actually call, IT WAS HIS WIFE!! Wen him did say "mi inna di parking lot. Open di door", di wife did pick up same time say supm neva right, cause weh dem live nuh have nuh parking lot, and di bredda have him owna key fi di house, an always jus come een an neva yet ask him wife fi come open di door. Di wife mus did also quickly calculate say if har husband did really a guh back a him workplace den him also wouldn't need anybody fi come open door cause him have him owna keys fi him workplace.

Fretteration staat tek di bredda. Di bunna girl staat try fi comfort him an a indicate to him say a good sort-out woulda help him relax an stop stress bout di situation. But di way how him did a fret bout weh him wife find out him instrument couldn't even get up. Nuttin couldn't gwaan. So him cut.

Wen him reach home him notice say him house dark. Him tek time carefully go een an tun on di light dem. Den him see a paypa pon di table. Him tek up di paypa and notice say it was a note. It simply said: "Gone to find a man to —— me in a parking lot." Di man get weak an shorta breath same time! Him say him did staat feel like him a get a heart attack. Him grab him phone an mussi call him wife a million times - no ansa. Him den call di bunna girl an tell har wa happen. She tell him say him can return to har house if him waan, but it probably woulda betta if him stay a him yaad in case di wife fahwud. Him stay home.

Di wife neva return until afta 9 di nex mawning. A di fus inna dem many years of marriage shi eva sleep out. As shi reach home shi just immediately mek him a shell-dung breakfast a gi him like nuttin neva happen. Den shi guh pon har phone an a labrish an a buss big laugh wid har fren dem.

Di bredda say fram di incident di wife nuh say nuttin to him bout it an him nuh say nuttin to har eeda. But him say a nearly a year now an it still a kill him. Him say him still cyaan sleep a nite time di way how it a ride him.

A suh him now a ask me wa him fi do - if him fi ask har weh shi did deh an wa shi do di nite shi sleep out, or if him fi jus low it?

Dere is a whole heap a tings weh wi coulda discuss inna da mix-up ya, but one ting him definitely haffi tink bout - if him ask him wife di question dem, would he be able fi manage har ansa? Di trute coulda kill him.