Raga mi did a deal wid dis policeman. Him have him woman but him did treat me good and me treat him good. When me and him did a talk him did buy me some things. One a di things dem weh him buy me was a standing fan. Raga di bwoy did start disrespect me. Me tell him say di only other woman him can have with me is him woman weh him did already have when me and him start talk. But him start bun me with other woman and me tell him to stop and him wouldn't stop an just a tell me bare lies. So me bruk it off with him Raga. When me bruk it off him tell me say that cyaan happen and him come a fight me fi sort out.

But later him come back and ask back fi money weh him did give me and want back some things weh him did give me. Me tell him me not giving him back nothing. A so him grab up the fan fi tek it weh. Mi hol on pon di fan and did a wrestle with him fi get it back, but after a while mi just leave him with it and tell him say him nuh have nuh use because a only careless man tek back a fan weh him did give a woman. Me and him end up done the relationship, and is a good while now we don't talk.

Raga yu nu know say anytime mi go ova mi girlfriend yard mi notice she always nuh waan mi go in her bedroom. Me used to could go in there and all use things offa her dresser, but lately anything me need from her bedroom she run go fi it quick and keep the door closed. It look like she don't even did want me ova her yard too much. Raga mi get suspicious an nuh wild her. One day when me at her yard an she did have fi go outside, me run go peep ina her bedroom. Raga guess wa mi see? Di fus ting me see a di fan weh di careless police bwoy did tek back from me! Raga mi shock so till! Mi couldn't even talk good. Cause a one time me did mek she meet him and dem did only say hello and me and him did lef and go Carib. So same time me a wonder a how she and him get fi involve to the point weh she get di fan.

Wen she come back een me jus use me head pon har an start shout afta har bout how she wicked cause me and har supposed to be friend and how the police just tell me say him and har a sort out. Mi start tell har say she evil and a bag a tings. A so she start confess and start gwaan like she want cry. But mi neva stop cuss her Raga, and mi start to shub her. She start shub me back. Raga yuh know say the gyal get bright and start cuss me say afta a neva my man, a everybody man, and how me know say the man done have him woman long time, and how a me wicked because she know bout one next little man weh me did always have with the policeman. Raga a true bout the next man with the policeman, a one bwoy weh me like and every now and then me and him have sex. But Raga me did tell har that as me good friend. Me don't know when she and the policeman did start do them thing, but me know she did always have fi her man too, from long before me meet di policeman. And I would never get involve with fi her man. Raga you nu think mi have a right fi get back the fan from her? And me nah lie, right now me feel fi go tek fi har man weh she de wid long time. She not fair Raga.

Yuh know seh di whole a unu Mad! Mad! Mad!!

First, gyal weh di baxside yuh a tell police bunna man say yuh a go call me bout him deeds fa??!! A me yuh waan dem come tek set pon??!! Unu fi stap it!! Unu woman who keep on a tell unu police, politician an gunman dem bout unu a go call Raga, UNU FI STAP IT!! Awoh!!

Next, mek mi see if mi really can first undastan di mix-up: policeman have him woman, policeman a bun him woman wid you. Policeman buy you tings, including a fan. You a bun policeman wid anneda yute. Policeman a bun you wid a bag a oda woman, you tell policeman him mus ongle a sleep wid him woman, you lef policeman cause him won't stop bun you wid oda woman. Policeman tek back him fan, you find di same fan a your girlfren house. Yuh girlfren say she been taking di policeman cause is not your man. But di girlfren also have fi har owna man, now you waan back di fan an also waan tek revenge pon yuh girlfren by tekking fi har man!!! Puppa Jeeezas!!!

Hear mi, mi pass mi word limit fi mi column suh mi cyaan write much more. But FIGET DI FAN an move on wid yuh life!! Di policeman cayliss wid him Missa Tekki Back self, but yuh a gwaan cayliss too like seh di fan value equal to di value a yuh nookie. An nuh bada guh try sort out yuh fren man needa, cause yuh woulda jus a fling yuh self inna more mix-up deh so.

Mi have nuff more mi waan say but space don't allow me to do so. One ting though, afta mi medz da mix-up ya it jus strengthen di following principle: TRUST NO ONE!!!

mixupraga@gmail.com