It's sad to say, but when some people ready fi mimic animalistic attributes dem tek it on betta than di animals demself! Some a dem a like di bird wah feed pon dead meat or hyenas weh wait fi prey pon di weak!

Di Jon Crow impersonator dem sick mi stomach cause is only one such creature coulda tink fi rob people who meet inna accident! Mi used to hear bout it but never believe til it struck close to home. How can someone see people inna dem moment of misfortune and wicked and bare face enough fi rob and loot di people dem?

Fi see people inna dem most vulnerable moment an try profit from it? Is only a dutty corrupt inhumane mind can operate like dat. It is so scandalous fi think seh insteada helping an individual to safety people a try help themself to di people dem jewellry, money and any other items dem tink dem can snatch!

Before dem seek help dem a seek fi help themself to the victims tings. Nuff a dem come under the guise of being there to help but actually come fi shop an teef and capitalise on the spoils and agony wah people a go thru. How smaddy fi pop off a man chain when him goodly a tek him last breath or go inna one woman purse when she a cry fi help caw she no know which part a her mash up or a tek out baby items instead a tek out di baby?!

Before dem concentrate dem energy fi help and rescue dem busy a do odda tings and that's why many victims no mek it sumtime becaw though nuff people deh deh sum a dem have dutty motive.

Mi wonda how dem woulda feel if a did dem or fi dem family meet inna accident, and people so callous and wretched an treat fi dem family dat way? Mi wonda how dem woulda feel fi know seh dem modda or dem pickney coulda alive if all persons came together for their survival. I wonder how they would feel to be in a helpless and defenceless situation and people a tek advantage and dem couldn't do nutten bout it?

All of us are human beings and we cannot be so cold towards each other. The system has cracks inna it and more time a we same one haffi be our brothers keeper and we sista saviour, it just plain wrong fi loot and rob accident victims because everybody a sumting to sumbody.

Mi understand seh sometime people a go bout dem business themself a rush fi go ketch a meeting or a deadline and also understand that the vehicle situation may not always be ideal to help an accident victim but in Jesus name when and where it is possible mek we try an help nuh!

So many people will pull over on the side of the road fi fass an tek picture and block up traffic yet dem woulda neva rush carry smaddy go hospital! Dem call di whole universe fi tell dem waa happen yet dem no lend demself fi be part a di solution.

Di whole idea fi a tek picture of people inna accident an a post it pon social media is quiet insensitive and people need fi stop it. Remember though the victims may be stranger to you but dem family and friends a hurt and not everybody want a picture of dem family mash up fi a circulate as a reminder, because a one ting me know negativity spread like wil' fire!

Help can come inna different ways and form ... even if a person can't stop to be of physical assistance, them can mek a phone call to di nearest hospital or police station, radio station or fire department. While dem deh deh a do all a dat dem can call pon Jesus fi intervene and cover those who may be hurt because none a we no know when we back may be against di wall and we ago need a Good Samaritan.

Not withstanding yuh have some real good people a road. People who go above and beyond to help strangers sometimes even putting themselves at risk and mi haffi salute dem people deh. Sum a dem run lef all wah dem a do drop all their interest to help and mek sure seh victims are safe and secure and have the best chance at survival.

Mi haffi personally big up all the 'Good Samaritans' who helped my father and the other occupants in their time of distress. Words cyaa express mi gratitude.

We just haffi live and plant good seed so we can reap that which we sow. Fadda God a God an watch all weh a gwaan an even if nobody else no see when yuh go inna di man pocket or pop off di woman chain, memba seh fadda God naa sleep and wat goes around comes right back around. Ahoe!