Mix up big up to di gal from Linstead. Mi seh, Raga, di gal ave har gud, gud man weh a sen har guh a school, but tru shi red yeye fi car drive di likkle crowbait guh run dung di ppl dem man, an now di likkle nastiness affi a pay di man fi im sawt har out.

Mi seh, Raga, di man cut off di likkle ——-termite, an di gal nuh stop blow up di man fone bout shi waa im fi sawt har out. Mi seh di gal nuh stop use har daddy money an a buy di man KFC. Raga, yuh si all wen di man aguh collect di likkle money im drive guh dung inna a dark place weh nuh bady caa si seh a im. Di gal all a breed now an shi nuh know a who breed har.

Raga, di wuss part is di gal caa even cook an di man guh find a ooman weh can cook, clean an everyting. Raga, di man all say di gal sawt out nuh gud. Har mada all a run har out an shi caa even chat bout shi aguh go a di man yaad cuz im still live wid fi im mada too.

Mi seh di gal tun laffing stock up ya, Raga. Di taxi man dem a dun di gal, dem nuh stop laff affa har. Raga, tru dem tings deh a mad har shi run tek up har self run gone a di man ooman yaad bout shi waa diss di ooman, but shi ketch har fraid an guh back a har yaad.

Suh di ooman kindly find di gal yaad an did aguh gi har a fine beating. But di ooman just calm har self an all di gal cuda duh a siddung out a di gate a look pan di ooman. Di way di gal frighten shi just affi look cuz shi neva expect di ooman a har yaad, di gal did jus affi quat. Raga, di man not even a gi di gal dem nuting, but mi hear seh a di ting weh im ave dem a run dung.

Raga, u nuh si a eediat gal dat bout shi a use har daddy money a mind man an a pure KFC shi a buy im more wile. Raga, im nuh ramp fi bax dung dat pan road. A regular shi get bax dung like a medication shi a tek. Raga, wat a baxside wen di daddy money dun an shi nuh ave nuh money fi buy pampers fi di pickney weh shi affi guh mind pan har own. Di man all ave about 5-6 baby mada an im nuh deh wid nun a dem. A di gud, gud ooman weh im ave a mad im an im naa lef har fi nubady. Raga big up yuhself an big up di Caldina taxi man, weh nuh ramp fi tek di gal daddy money.

Brap! Brap! Brap! Mad sitin ova Linstead!! Gyal a trow di ——- paadna an naa get nuh draw! Maawwd!! If weh yuh say a true den shi a real eediat. It look like di Caldina man really have har like a clown. A suh good wuk can tun some people inna fool. Him a mad har wid di open-purse sort out.

But pon a different note, if yuh say di man have a whole heap a babymada, an if him have da one woman weh him really love, how come yuh only a write bout dis one girl? Yuh an har have supm? Yuh an har inna some kind a drama? It sound to me like yuh nuh like har fi reasons weh involve you. A bet yuh say yuh a tek di Caldina man too. Don't it?! Talk di trute! Cause supm inna supm di way how yuh jus a reel out har file suh. Write mi back an sen on di hundred.