RSS Feed
Follow us on Twitter
Star YouTube Channel
with Ragashanti
Greeeeeeeeeeetings, I bring, from Jah, to aaaaaaaallllll ragamuffins! Yuh know seh all now mi still like da big bad Half Pint chune deh. It tough, mi naa lie.
Anyways, bless up to all a mi Tambareen Fambily linky-linky an propa respek to all Mixocrats. An of course, big ups to all listeners pon Tambareen Radio ova Mix-Up Yaad (mixupyaad.com). Straight blessings.
Bwoy, di big mix up wid di resignation a di prime minister still a cause bare drama. Is a crocus bag a tings a rinse in di streets. Di prime minister himself jus rinse out di reasons why him a cut. An right ya now a crazy prekeh a buss up inna di JLP fi see who a guh be di next leader. See it deh too, di 70-year-old Deputy Prime Minister, Dr Ken Baugh, already a dash rhetorical dutty wata pon Bruce, because inna him speech Bruce did a encourage di election of a younger Prime Minister. All mi haffi say is dat di last general elections was undoubtedly di most entertaining ever - but now mi feel certain da one ya a guh be even betta. Mi jus a gwaan exercise up mi mout fi buss out some big brawling laugh wen di ray-ray staat. A mi fi tell unu!!
Fambily, nuh feel nuh way, but mi haffi rinse likkle bit pon da drama ya weh mi notice fram long time. Unu eva notice seh Jamaica full up wid nuff raypa dawg? Yes! Same suh. Di Jamaican man dawg dem always a gang rape di woman dawg dem! Mi travel all over di worl an wen it comes to sort out di farin dawg dem nuh crabbit like di Jamaican dawg dem. Di Jamaican dawg dem have a style weh all eight to 12 a dem wi rush a one female dawg an dem naa stop till dem done har. A dem say straight battery. More while di female dawg dem haffi get wicked wen dem a defen dem supm. Some female dawg haffi bite up some a di raypa dawg dem weh a run een, or use dem paw an dem claw fi stab up dem up an all juk out dem yeye. Di raypa dawg dem wi eventually lowe di female dawg dem weh wicked an viciously defen dem ting. But di raypa dawg dem nuh ramp fi done out di female dawg dem weh soft an fraidy-fraidy. Sometimes di raypa dawg dem mash dem up till dem cyaan even walk good.
But mi a guh deep now. Sometimes, mi haffi wonda if di animal dem reflect di mentality a di people dem weh surround dem. Cause while nuff farin dawg an Jamaican uptown dawg sort out like any oda dawg, mi notice seh dem still nuh crabbit like di ghetto raypa dawg dem. Mi naa diss ghetto wen it come to di rape ting, cause nuff raping gwaan uptown too, dem jus keep it quiet more. But mi jus notice seh di ghetto raypa dawg dem jus more vicious wen dem a roll inna dem raypa crew. An unfortunately is a similar way di dutty raypa bwoy dem gwaan inna ghetto - except sometimes dem even worse dan di real dawg dem.
But weda yuh a real dawg or human dawg; weda yuh a Don or yuh a plebs; weda yuh did gi di woman yuh tings or not. So di nex time yuh see di dutty raypa dawg dem a move fi battery a helpless or outnumbered female dawg, don't jus ignore di drama. Kick di raypa dem inna dem nastiniss! Call di police. Save a dawg. Help a dawg. A dat mi seh.
Bless up unu self.
