Fambily mi nearly kin ova wen mi get da mix up ya. A man tell mi seh one time him get een a one accident inna him workshop. Di accident resulted inna serious damage to him instrument. Him say wen di accident did happen him bawl out an call him wife fi come help him guh hospital. But wen him wife reach shi a tell him say him don't haffi guh hospital cause di injury nuh serious. Him staat insist seh it serious an dat him mus guh hospital right now. But di wife hol' har ground an jus wash off har husband instrument wid some warm wata and apply likkle dressing dung deh.

Months past an di husband say one day him hot up some tea inna di microwave. Him mussi miscalculate di hotness a di tea an fly guh drink it quick. Di tea bun up him mout an tongue bad, bad! Wen him wife see dat shi bawl out an run guh get one towel an gi him fi put pon him mout. Two twos shi push him eena dem cyar an a drive wicked wid him guh a hospital. Inna di car di husband say him tell him wife say him nuh need fi guh a hospital him mout awright. Him say di wife reply dat he could have damaged his tongue an dat dem cyaan be to careful. Dem reach hospital an di docta treat him an tell him say nuttin serious nuh do him, an him mus jus be more careful next time wid hot liquid fram di microwave.

Now fi di real prekeh inna di mix up: di husband believe him wife response to di two incident are tied een wid anneda issue weh dem been having. Him say him wife nuh waan regular sort out, a bare swipe shi waan. Him say nuff time wen him waan sen up di sinting him wife a hitch, but anytime him fi swipe shi eva ready. Him say him nuh mind swiping him wife, cause a him wife an him love har. But him say him a staat to believe say shi really selfish an nuh care bout him as much as shi should. Him convince say di day shi fly carry him guh hospital was LESS about concern for him and more about saving his TONGUE! Puppa Jeeezas!!! Di man believe seh if him instrument cut off him wife wouldn't care, shi jus waan mek sure say him tongue awright. Di wife value har husband tongue way ova him instrument!

Fambily, wen di man a tell mi di mix up a jus di strength a God mek mi nuh buss out a laugh. Mi couldn't laugh cause him did serious an troubled. Moreso a nuh cayliss man inna cayliss argument, a big successful, respectable, decent businessman weh all guh church regularly. But mi nuh know, it jus look like as far as him wife concern, big tings a gwaan fi him tongue an nuttin naa gwaan fi him tool.

But hear wa, mi want unu write mi an tell mi weh unu tink bout da mix up ya. Unu tink di husband a misunderstand di wife? Unu tink di wife really place more value pon him tongue ova him instrument? An if it is so, weh him fi do? Write me an mek mi know wa unu tink. Sen unu email to: mixupraga@gmail.com.

Bless up unu self.

Reach Ragashanti at

mixupraga@gmail.com orPO Box 5866, Liguanea PO, Kingston 6.