Mix-up big-up to di uptown woman who staat talk to a man who seh him like all different kind a curry meals. Because di woman waan please di man, shi guh ask smaddy how fi cook curry chicken fi him. Afta di smaddy weh shi ask tell har weh fi duh, my girl guh pu dung one helleva curry cooking fi har new man. Wen di food share di man staat look funny pon di food. Shi ask him what's wrong? An him ask why di food look suh? An why di dumpling an banana have da colour deh? People ... unu ready fi dis? ... yuh know seh afta shi supposedly cook di chicken, di damn gyal guh trow a whole heap a curry inna di pot weh a cook di dumpling an banana??!! Puppa Jeezas!! A wa duh da woman ya man??! If a laugh mi wet mi good-good boxer brief weh me a siddung inna a type. An wait deh nuh, it look like a nuff curry shi fling inna di bwiling pot, cause wen di woman a tell har how fi cook di chicken di woman did say shi nuh fi mek di curry watery. Suh dis poor uptown gyal ya now mussi guh feel seh di same ting need fi apply to di bwiling pot wid di dumpling an banana, an a suh shi end up a trow een a whole heep a curry jus' fi mek sure seh it nuh too watery. Fambily, unu know seh di pot weh bwile di food already full a nuff wata, suh unu can jus imagine how much curry shi fling een deh fi nuh mek it too watery. Das why mi a nuh Frighten Friday fi hot gyal, cause some a dem might look good but dem wukliss an baff-han lakka wa. An wen dem nuh baff-han nuff a dem nasty. But in any case, mi did tempted fi done Miss Curry Dumpling, but true shi really nuh know betta mi a guh lowe har.

Awright, mi a cut. But unu gwaan big up unu self an rememba di motto: Laugh, Learn an Grow!!

An to all a di dutty bad mind so-called regulators an unu fren dem weh a plan fi done mi: unu guh walla walla in a pig sty! Cause some a unu an di pig dem a twin.

Unu nuh bada maaaaaayyyyyyyyy! DWL!