Mout-amassi Liza, yuh no

Hear yuh mumma dah call yuh?

Meck yuh mout so galang plang?

Hear yuh mumma duh call yuh!

Yuh mout so fly, yuh mils tell lie.

So member seh me dah warn yuh:

Liza, kibba yuh mout!

De way people wash dem mout pon yuh

Yuh naw go strive, missis;

Far everywhe yuh tun yuh hear

Seh Liza do dat an dis.

Yuh hear dat Liza chat to much,

Yuh hear dat Liza seh,

Yuh hear seh dat is Liza meck

Mass Tom black puss run weh.

Liza, kibba yuh mout!

Yuh meck Miss lattie husban put

Har sinting outa door,

Yuh meck Sam do fi purpose

An hat up Jem sore toe.

Yuh can gwan chat, but doan figat

Yuh gwine reap what yuh sow.

Liza, kibba yuh mout!

Counta yuh, Dan set him grampa

Duppy pon Sta Rose,

An counta yuh Jane teck grudgeful.

An pwile up Fan new clothes;

De way yuh chat yuh meck Jinat

Go obeah Laura nose.

Liza, kibba yuh mout!

Yuh meck dem lock up Tayma fi

So sen her bwoy a school;

Yuh meck dem lock up Geral,

an It tun him mumma fool!

Yuh meck dem bring up Dora, seh

She overwork her mule.

Liza, kibba yuh mout!

Dem mussa put yuh so, missis -

Is weh yuh dah go do?

From me bawn me never see

Nobody chat lacka yuh.

Me hear Miss Della she dah swear

Fi tun yuh mout backa yuh.

Liza, kibba yuh mout!