Fambily, hear da drama ya. Dis man an him wife married fi many years. Dem have two pickney. Di wife say di man is a great husband. Him treat har good, neva abuse har, and is a great provider fi she an di pickney dem. Dem live inna nice house an have nice cars an all dese tings.

Di ongle ting is dat di man also have a bunna gyal fi many years. Him an di bunna gyal (matey) a come fram far too. Di matey treat him good an him treat har good. Di matey was very loving to him an neva bun him wid any bady else. Di matey was always very respectful a di wife an neva yet dis di wife, an all mek sure shi remind di man bout important tings weh him need fi do fi di wife. Most people jus have it say di man respect an love both him wife and di matey. Him pretty much gi di two a dem all dat they need.

As it turn out, di matey get sick an passed away. Wen di matey dead it mash up di man wicked, wicked. Den hear ya now, di wife guh to di man an say shi know bout di matey all dese years. Shi say shi neva like wa him did a do, but shi suffa through him lies an work wid him di whole time. Shi say all shi a ask him fi do now is to NOT go to di matey funeral. Shi say given dat she has been so understanding she's asking di man fi do har dis one big favour an doan go to di matey funeral.

Fambily, wa unu woulda suggest to di man. Mek wi acknowledge say nobady like fi get bun, suh di husband shouldn't bun him wife inna di first place. But given that di husband otherwise treat him wife an him family real good, an given that di matey did treat him so good fi many, many years, should the husband go pay his last respects to di matey? Or should he grant di wife har important wish an doan go to di matey funeral?