Bwoy when mi granny used to seh a nuff slip between di cup and di lip a neva lie she did a tell at all! Life have a way fi throw some naa look lick, bax an tump pon yuh weh if yuh no strong and know yuhself yuh mad like shad!

It especially hat when is matters of the heart weh yuh cyaa go a docta fah or tek a pill fi ease the pain. Nuff people tink seh life come inna black or white but a nuff grey area deh bout weh can mek yuh feel lass! Why when yuh single an no have nobody it seem like nobody no waa yuh an as soon as yuh find smaddy u see di person who yuh really want or smaddy who mek u a tink twice all three time to bout who yuh deh wid?

Sometime yuh deh deh by yuhself all along all unperturbed and the moment you decide to settle there come sum kinda 'up-stirment'! Love and relationship is a wonderful ting when it's going right and how we want it fi go. Of late though mi mind a wonda bout a crocus bag a tings weh nuff people probably tink bout but too fraid fi ask. Though many people frown on polygamy Jamaica a di biggest secret polygamous society! Jus' check how much woman one man have, how much man one woman have and of course how much 'outside' pickney born a year time! If di pickney neva born inna di matrimonal home it must mean seh 'saltfish' did a pick up elsewhere! So mi wonda though monogamy has it merits and credits is it more of a societal construct that goes against our natural state? Caw nuff woman cyaa find one man fi mek a complete man an sum men will argue seh dem cyaa find one woman fi mek a complete one.

Den again even when yuh find one an go so braps an sekkle, am I always gonna wanna be with this person for the rest of my life? What happens if we grow apart, start having different dreams and goals, or mi jus' see smaddy else wah mi want? Nuff time we have likkle saying like it's not all dat glitters is gold or it not always greener on the other side. That might be true but what if it is? Sometimes yuh deh wid some people and yuh cut off yuh nose fi spite yuh face and at the end of the day yuh life waste because yuh did fraid fi look ova di other side!

right love, wrong time

A next ting weh deh pon mi mind is if yuh find the right love at the wrong time should you take it or leave it? Sas crise dah one yah pressurising bad! Nuff people tink seh is di quantity of time weh determine if yuh stay inna one relationship or not. Many sit in relationship caw a 15 years dem deh wid di smaddy but at the end a the day r u happy? Yes unnu might deh fi 15 years but 15 years worth a wat?! The quality of time can't be overlooked because yuh can dis meet smaddy an yuh an dem connect like unnu deh pon Digicel network ... everyting plug in an it bigger an better!

If you an smaddy a 'come from far' but where yuh reach dem is more of a liability than a asset weh yuh fi do? Yuh have relationship born outta obligation and sympathy because the individual may have been there during your growth period as Buju seh from yuh bruk an no have nutten and only inna one pants but is that grounds enough to stay even if you're no longer happy wid di person? A me seh loyalty ova royalty and mi ignorant fi people who a ole dutty opportunist and ole ungrateful user caw people fi memba kindness but how can I respect your kindness and still mek mi self happy without you? Some people have delusions an dem far away from reality and though dem know seh di relationship no deh deh and di love dun, dem still a try hold on to di bitter end and a deh people start dislike dem one a nedda. Bwoy love is a funny ting weh all when u tink yuh have it figured out it wappy back pon yuh an lay yuh flat!

Love sweet but it rough as we have to make hard decisions sometimes. Yes di person might feel a way but we haffi selfish sometime cause a one life we haffi live so we must mek each moment count!

By the way mi a invite out all mi readers an' fans an A/C dem a mi party it name Magnum Marina Sundays outta Danny's Marina a Harbour View. Craaawb up '70s, '80s an '90s music retro vibes! Every second an last Sunday a di month so di next one on June 26! Come out early come party right by the sea! Lalalalalalala!

misskitty@gleanerjm.com