Propa respek to mi Tambareen Fambily an mi Mix-up an Blenda linky-linky. An bless up to all a unu who lock een pon Tambareen Radio since di soft launch. A bare tings unu a gwaan wid, particularly wen unu talk up di tings dem inna di Outa Orda show. Who nuh know yet unu fi roll een, wi online at www.mixupyaad.com or www.tambareenradio.com. A mad tingz!

Mix up time now:

^{St Thomas Man dem inna Spirit}

Big up uself, Raga, str88! U tun up d mix-up two days a week n mi rate dat. Anyways, mi av sum neighbour yaa a ketch inna spirit n a throw wud pon people. Dem start inna nite n naa dun til in a early mawning. People caan get fi sleep. Mi seh, Raga, a two man, n wen u hear dem inna d house u tink a six church sista! Dem soun like woman! Dem av 100 voice n mouth loud lakka seh dem av a gun weh dem buss, bouii! to d east, bouii! to d west, dat time dem a point it ova people yaad n a fire it. Dem say a dem spiritual gun, a dem elbow dem use, lol. Police all cum to dem n dem tremble lakka leaf, caa dem fraid a police. Dem nuh do it too often now caa d police warn dem off. A St Thomas wi deh!

Wait deh weh yuh really a tell mi seh? Dem two man ya say dem a God people an always a get inna spirit wid dem one anneda fram nite till a mawning an a bawl out like woman togedah? Eh eeeeeyyyy!! An den dem say dem a fire spiritual gun an a buss it to di east an a buss it to di west? Aaay bway, mi tink dem really into dem God fi true, but mi also feel seh sinting else a gwaan deh suh. How two man fi always a get inna spirit wid dem one anneda suh regularly a nite time? Why dem nuh bring nuh bady else fi get inna spirit wid dem? How fi dem spirit suh private? An dem a bawl out like woman! Mmmmmmm????? Min uh know still, but mi instincts jus a tell mi seh supm eena supm wid dem. Keep mi updated. Bless up.

Stulla Pastor

Raga, big up mi church sista who a sort out the pastor. The pastor carry har go a him yard an make she talk up to him wife. The wife cook fi har and treat har good and give har food fi carry home. Sometimes when the wife a call the pastor an him a sort out mi church sista, the pastor just tell the wife say she have to wait because him a sort out an emergency with a church member. Raga, a long time the pastor a sort out the church member them. Him wild.

Well, we all know seh pastor nuh fi a duh weh di worldian dem a duh. Pastor fi hold to a much higher standard. But even if di pastor a duh him likkle bunning ting, why di baxside him a carry di matey guh a him yaad an mek him wife a chat up to har an a cook fi har?!! A wickedniss dat, man! Mi know some a unu a guh say if di wife nuh know nuttin, den a nuh wickidniss, but mi disagree. If him waan bun him wife a fi him bizniz dat, but him shouldn't a mek him wife, a cook fi har mate. An di mate too damn fool-fool too. Shi really nuh know di matey rules dem. As a mate, yuh must neva eat food fram di wife, because yuh can neva be 100 per cent sure wa di wife know, an if di wife decide fi poison out di matey. Suh da mate deh a eediat. A one hungry- belly gyal di pastor guh pick up. Di pastor probably a wuk har fi bag juice. But mi lose offa di pastor, 'cause right ya now him mek di matey a look pon di wife an a laugh afta har quietly. Man nuh fi duh dem tings deh. Him fi keep di ting separate. A dat mi seh! Bless up.

_{Ragashanti at mixupraga@gmail.com or PO Box 5866, Liguanea PO, Kingston 6}.