Tambareen Fambily an Mix Up massive bless up unu self. A hope unu naa wash weh inna dis ya whole heap a rain weh a mash wi up. And at least nuff a unu doan have any more excuse not fi bade. Lol. Awright, mix- up time:

Mix-Up Fan

Raga, mi love yuh Tambareen Fambily an Mix-Up Blenda massiveinna de Star.Mi read it online every time it publish. Blessin to yuh Raga.Keep it up.Nuh matta how dem a fite yuh.

Nads, NY

Nuh say a word mi link. Wi deh ya a give it to di crasses dem same way. No retreat no surrenda, NEVA! An jus gwaan read di STAR same way as wi continue to provide you an thousands of others wid our form a cultural entertainment.

Dutty Wicked Bes Fren

Raga mi always hear mi best fren a talk bout har fren weh she meet an how she check fi him but mi neva know say dem a sort out cause she have har good-up man. She introduce the man to me one day afta him come back from farin an same time mi luv him off. Him nuh hype but him have nice tings. Mi an fi mi man go up a mi fren house an see de man, so mi ask him fi drop mi dung the road fi buy ice cream, an wi go sort out inna some bush inna him jeep. Raga a him a stulla, every day wi sort out since dat. Mi all left mi man inna di bed a sleep go sort out an come back. Mi fren find out an all come a mi work fi war mi, an call mi man an tell him. So mi jus call fi har man an talk di tings too. Raga, har man get mad an say him all deh a work one nite an de gal say seh she see duppy ina de house and tell him fi beg de same fren fi stay wid har. Raga de ting is de man an de two a fi wi man a big fren now, but mi an my fren nuh talk cause she claim say a bad mind mi did badmind har.

Yuh know seh yuh damn wicked! Yeah, yuh bad mind fi true! Yuh argument dat it was okay fi yuh sort out di bredda cause yuh neva know seh yuh best fren did a sort him out and because shi have har good-up man DON'T HOLD WATA! Fram yuh fren introduce yuh to di man an yuh see seh she a par wid him so much, yuh nuh mus expect seh something a gwaan between dem? Yuh did damn well an know wa did a guh dung between dem. Cause if you have your good-up good-up man, an she have fi har good-up good-up man, an if di two a unu a best fren, den at di very least yuh shoulda ask har wa a gwaan between she an him, an tell har seh yuh like him, an ask har if it okay fi yuh tief a piece a sort-out fram him. Instead, yuh very wickedly engage inna a ting weh boasy people call 'plausible denial', weh yuh clearly know supm, but yuh deliberately doan bring it up so dat yuh can do yuh wicked deeds an always act like yuh neva know di supm. Yuh a wicked! A people like you cut Jeezas slippaz! Wid you as a best fren, yuh fren nuh need nuh enemies. Yuh tan bad! It grieve mi fi people like yuh. Yuh ole dutty Judas!! A mussi di 'nice tings' weh him have did ketch yuh red yeye, yuh ole traitor! Yuh come een like some dutty, wicked bad-mind people weh nuh stap fite gainst mi, who jealous a mi an a badmind mi, but always talk bout a cause dem a promote 'upliftment' an cause dem waan 'protect the children' why dem a fight mi. People like unu put up a so-called 'honourable' shield fi hide unu wickedniss. Gwaan same way an see if bad blessing nuh falla yuh like wen tief a falla money. An ku deh too, you an yuh fren naa talk, but di two a unu have unu good-up good-up man dem a fren an a talk up to di same bunna man. Puppa Jeezas!! Wickedniss increase!! Den unu wonda why nuff man jus roll wicked an nuh trus no woman. Kiss teet! Try write mi back an sen a pitcha a yuh-self mek mi see how Satan concubine ^{look, cause mi waan stay} faaaaaarrrrr fram people like you. Yuhole Jezebel!! Cho!!

_{Ragashanti at mixupraga@gmail.com or PO Box 5866, Liguanea PO, Kingston 6}.