Howdy! Time fi get rowdy!! Wah gwaan, mi peeps? As usual, Tambareen Fambily an Mix-Up an Blenda massive, large up unu self. An propa-propa big-up to all a mi Internet peeps pon Tambareen Radio. Awright, time fi talk up di tings dem:

Farin Big-up

Raga, bway, mi jus waan mek yuh kno sey, pan a daily basis yuh ave mi a ded wid laff. All wen mi guh pan di jab, mi siddung inna mi afficea mawnin time, di fuss ting mi open pan mi cumputa a di Gleaner an Star fi ketch up pan wat a gwaan a yawd, an yuh dun know sey mi save di mix-up an blenda fi di lass.Yah, mon, mi a pree all wah a gwaan wid yuh linky-linky, Tambareen Fambily, mi sey, woee!! Mi belly hat mi sometime an mi all haffi a kibba mi mouth fi nuh pap out big laff inna di wuk place.Wen mi deh a yawd (JAMROCK), mi hafffi tun on mi aise dem fi lissen tu di laatess mix up wah a gwaan.

Mi dun kno sey yuh a ketch nuff fite fram di haatas dem (di system/so-called society peeple), who cyaan stan fi kno sey a suh tings a run, an dat fi dem mix-up a reech di massive still.But yuh dun kno sey di real peeple dem wahn know di laytis mix-up, 'cause a suh Jamdung run fram lang time, likkle labrish naw kill nuh baddy, az a mattta af fac, itgudly keepsumma di shatta an thugsdem cool fi a likkle while.Big up, bless up and gwaan educate yuh nation and family. A fi wi langwige an dialec, but dem waan kill it aff an gwaan like sey a ongle unedukated peeple fling dung dem ya chat yah. Woooeee, a Raga mi sey.

Dalton

Mi boss, mi nuh know a weh yuh a write fram, but big up yuh self to di max. Mi jus waan say blessings an respek fi di encouragement. Yeah, di crasses boasy people dem dung ya a give it to mi wicked. Dem an di Broadcasting Commission a pressure mi ting like wow. But a press on wi say, straight.

Mi laugh wen yuh say yuh lef mi Mix-Up an Blenda Star column fi last. It mek mi memba wen mi likkle bit an a eat mi dinna an always a save di meat fi last. LOL! Especially Sunday dinna, wen mi lef mi chicken leg or mi stew beef fi last.

Maawwd!! Anywayz, a jus more blessings an protection to di I, an to all a unu a farin who undastan my entertainment an see where it have value. Mi jus a guh gwaan rinse mi Mix-Up an Blenda inna di STAR same way, an gwaan blaze out di tings dem pon mi new online radio station, TAMBAREEN RADIO. Bless up unu self, straight. And as always, 'Laugh, Learn and Grow!'

Relative A Rob di Farina Dem

Raga, big up mi tiefing relative a Ironshore, Montego Bay, who tief off mi money weh mi work hard an send a Jamaica fi build a house. Him wicked, Raga, him wicked bad. If me did deh a Jamaica, him couldn't get weh wid it.

My girl, a long time dat a gwaan. Di farina dema sen dung dem good-good money fi buil house an di people dem a Jamaica a rob dem out. Some a di people dem a Jamaica all sen pitcha guh gi dem a farin a show di different stages a how di house a buil. Dat deh time a smaddy else house a buil. A suh yuh have farina come a Jamaica an present demselves a people house bout dem a di owna, only fi have di real owna dem a treaten fi chop dem up! All some a di lawya dem dung ya rob up di people dem a farin. A bare tings yow, unu haffi careful wid unu hard-earned money fi real, 'cause a crazy ginnalship a gwaan dung ya. Cho!!

Reach Ragashanti at

mixupraga@gmail.com or PO Box 5866, Liguanea PO, Kingston 6.