Mi granny always seh cow neva know the use a him tail til fly bite him and so many people don't have a clue as the importance of a good mother until she gone. Sometimes we take life for granted, complain bout everyting an' no realise seh tomorrow no promise to none a we. Mi know unnu love mi so mi can share mi bizniz wid unnu caw unnu know mi a real woman like dat.

Moddas Day was bitter sweet fi mi and will neva be the same caw mi granny pass off. All now mi cyaa believe seh Norma Clarke, mi goodaz granny no deh yah inna flesh wid mi again. Fi call her an' beg her bake potato pudding fi mi, fi sen' up sum a har curry goat special or call fi bodda her and ketch sum a her facety chat dem. Mi granny was a true matriach wah set di tone of independence, hard work, no tek no foolishness from people, talk yuh mind an' help people, which has been embroidered in my DNA.

no treat pickney good

Mi know sometime tings no always work out how we plan cause di truth a di matter is dat when man a plan God a wipe out and even through the storm di fadda deh deh by we side. So many times mother no treat pickney good, pickney no treat mother good and people jus' no treat people good. Some people love fi live like hog an' dawg and a when ataclapse tek dem everybody a seh "if mi did know". Mi glad mi did live good wid mi granny, tek care a her an' no mek she waa nutten. Di only regret is mi did waa more time wid her but the wonderful memories will live on forever.

Wah day yah mi see a woman ruff up one likkle bwoy an' di lick she lick him inna him face mi swear him have lock jaw! To how di woman a hangle di pickney mi feel like mi waa grab her up! Mi no seh pickney no rude an' mustn't be disciplined, but there is a stark difference between discipline and abuse. Mi a wonda if she know seh dah likkle bwoy deh a go grow big an' memba wah she do?! So many times adults cast out or put down the child or children who dem tink a go tun wutliss an' as mi granny woulda seh di same stone di builda reject tun di head corna stone! We haffi treat di pickney dem good so when they should become adults they will have care and compassion to who grow dem.

Big up all di mothers who sacrifice fi dem pickney and no compromise pon wat is right. Nuff a di problem wah we have now a chu nuff mothers no tek a stand an' mek dem "belly pain" know when dem wrong. Yuh have some careless one who put man, dance and vanity before dem pickney but I want dem know dem waterloo a go come. Sometimes we see some meek ole people and wonda why none a dem generation no deh roun' dem, but they were tyrants inna dem young days an' di pickney dem a gi dem a taste a dem own medicine. That which you sow a dat u a go reap.

respect to the fathers

Nuff man out deh a hol' up the banner to enuh so maximum respect to the fathers who mother their children. Comb dem hair, read bedtime story, go PTA meeting an' mek sure seh dem yute well tek care a. Yuh no mus' have a child fi be a mother but the positive imput can lead to a massive impact.

Tek some time an' call, write or go look fi anybody who ever mek a positive mark inna yuh life an' big dem up before it too late. Mi glad mi eva did a big-up Miss Norm so she know she a di real big woman. Motherhood and mothering is not to be taken lightly as they are the ones who shape the world.

Walk good grandma 'til we meet again.

You can email me at misskitty@gleanerjm.com.