Tambareen Fambily an Mix-up Nation large up unu good-up good-up self. An mad respek to all a mi ghettolocious linky-linky dem. A how wi hot suh? A wa?

Mix up big up to di Ras weh did tan up outside a di KFC a UWI a ask students fi buy a meal deal fi him cause, him claim, him nuh waan nuh bady tief him bicycle wen him guh een. Wen none a di student dem dweet fi him, di Ras run een an buy him chicken and bolt back outside to him bicycle an ride weh fast like a tief in di night! Maawwd! Yeah, a nuff Ras a eat meat. Nuff a dem a tie up dem natty an a walla-walla inna sweat meat!! If a laugh a kin ova in ya todeh.

Anywayz, pree dem two mix up ya:

Anneda Missa Tekiback

A linky-linky offa di Ragashanti fan wall name J. Johnson sen on da mix up ya:

Mix up big up to di bwoy whey call him oman an seh him waan back him plate an spoon dem, cause him c seh she did a talk to a guy pon Facebook.

Missa tekiback dutty bwoy!! Lef di woman wid di plate an spoon dem!! Mek yuh wukliss suh??!! Noooo sah!! Yuh shame man!! If yuh waan bex seh yuh woman a pree man pon Facebook dat cool, but yuh nuh haffi a gwaan like a likkle punk bout yuh a tek back plate an spoon!! Dutty bwoy! Lef di plate an spoon!!Massa God, a wapm to dem cayliss man ya man?! Cho!

Carnival Mix Up

Next mix-up fram anneda fan wall linky-linky ‹is a shell dung carnival mix up, (mi change di badwud dem to oda words):

Raga a boy weh grow him hair do it ina mohawk style (like a female wud). Him a dance out wicked and a diamond chip drop out. The boy bend ova a luk fi di ear ring ina the crowd. Raga, a man neva know seh is a man bend ova and grab the boy from back way and wuda stab out him backscova wid wine. Raga, the boy did think a one a him female friend. Raga, the boy fraid fi touch the road. Mad mix-up. Him get sum soca dagga.

Da one ya fling mi a grung!!! Maawwd!! But 2 tings nuh soun right ya suh: yuh know seh mi stawt to a get suspicious wid dem man deh weh a run een an a fling up trang wine pon man an den a say dem did tink a woman. Mi feel seh some a dem man deh know weh dem a duh. An how di bredda weh did a get di wine fi a feel seh a one a him girlfren dem did a wine him? A suh him girlfren dem wine him regula dat it feel suh natural? An yuh a guh tell mi seh him couldn't tell man-wine different fram woman-wine? An wen smaddy come up back a yuh an stawt wine pon yuh, don't di fus ting yuh duh a look fi see a who a wine pon yuh? Suh why him neva look? Why him stawt back it up suh same time? Mmmmmmmm? Nooo man, something 'fishy' yah suh. Some ginnalship a gwaan.

Reach Ragashanti at mixupraga@gmail.com or PO Box 5866, Liguanea, PO, Kingston 6.