Mi heart goes out to the family in the multiple murder/suicide incident wah rock di whole a di world! Mi seh di incident come in like a tsunami wid prior warnings being ignored. Up til now mi cyaa believe seh a ting like dat go down weh so much innocent people life just end so because one man feel seh him did have di right fi dictate how odda people fi live dem life!

A nuff slip between di cup an' di lip an' mi neva know di man but based on the explanation of family members mi tink di whole a we come to the conclusion seh him did obessesive bad! Mi sorry fi di lady who haffi go wake up to the reality seh her immediate family gone because a di man! When mi a watch di news mi ignarant so til it sen' mi inna di matrix caw mi seh mi wouldn't incur no expense bout mi a bury dah man deh!

Yuh mean fi tell mi seh you an' smaddy deh fi how long him obviously did a do her di tings dem long time and she mek up har mind fi finally leave - mek di woman an' her pickney gwaan in Jesus name nuh! To how him wicked and heartless him mus' lef him yaad inna di hours a mawning fi ketch deh so early an' all along di journey him heart couldn't cool down or him have a change a heart? Dah man deh come een like him have evil weave inna him DNA!

To how mi analyse it, him come fi do a complete wipeout fi try fi cover up sumting! Even if him did ignarant fi di modda why kill di dawta an' di woman parents? Is like sumting neva suppose to come out and since dead man tell no tale den di secret woulda bury wid all a dem. Di family seh him watch di wife, watch di dawta an' monitor dem every moment. Search draw, phone, an' keep dem away from family members and friends.

secluded

Di lady sista seh even when she waa come she is not allowed and dem cyaa go look fi har neither! Well unnu see why me a go always cross, angry and miserable caw mi no run watchman joke! At first to many women, jealousy and obsession is masked as care, love and concern but it is not! Any partner, man or woman, who try keep yuh secluded from everybody else watch out. If dem waa know yuh every movement, watch out. Nuff time woman see man a behave dem type a way deh an' tink a good dem good mek him a gwaan so! Choo him no waa dem "gi it weh". Sometimes when di light a flash an' di bell a ring we haffi pay close attention because if we don't it could end up in bloodshed.

Nobody no own nobody. People choose to get together and people can choose to leave. The ideas of "mi cyaa live without you" or "if mi cyaa have you nobody else will" are thoughts people need to stay far from. No bwoy or no gal no worth yuh freedom an' sanity. Yes dem lef an' it bun yuh an' yuh a go bawl but yuh mus stop one day. Certain behaviour haffi nip inna di bud before it tek root because if you allow it fi form a hell fi break loose.

Nuff people siddung inna dem relationship a suffer and stressed out an' naa talk. TALK! Ask fi help or intervention if yuh cyaa manage it pon yuh own caw it might save yuh life. Stop tell lie and paint a picture wah no exist. To thine own self be true. Nuff time people get trapped because dem see di signs and ignore them and hope that it will get betta an' nuff time a waste pon hope. Mi only wish di man did turn di gun pon himself first like how a fi him 'heart not available until further notice' an' lef di people dem mek dem live dem life.

Don't be afraid fi run some people outta yuh life, yuh have good, betta, best an' sumtime dem inna yuh life jus' a block progress. Yuh cyaa force somebody to want you or want to be with you because if the love has already left the relationship it nuh mek sense. A one haffi jus strong within yuhself an' know seh life comes with obstacles - good and bad - and must be dealt with in a civilised manner.

Mi hope everybody learn a valuable lesson from dis tragedy and so that lives will be speared and no family has to suffer like dis. A big ediat ting dah man deh keep up an' mi no know a weh him a go tell fi him Maker seh! Mi ignarant fi him!