Now dat Days of our Lies dun I guess di big boys can have dem roun' table garden party celebration and count their millions and hail starbwoy BG for being a jolly good fellow who mek dem bank book tun up wid money even though grey hair a swarm dem!

At $30,000 a hour dem supposed to count til dem wrist sprain an' all nex' year dem supposed fi a count same way! Mi hope sum a di money weh dem mek will filter back inna di economy so dat di taxpayer dem who mek it all possible can get a likkle spin off. Maybe dem can keep a big free dance name Manatt Mondayz or establish sum law scholarship fi ease sum a di pressure pon parents who waa furda dem pickney education or dem can keep a big all-inclusive boatride wid lobster an' shrimps an' free liquor and di chairman can dash out some money like Flippa an' we jus' call him Emil Mafia!

All di stoosh counsel him who never get involved in crosstalk and is always putting himself above the fray, I hope him plan fi spen' sum a him US$500 a hour money weh him a go get before him cut! Some seh di entire enquiry was a sham and charade but mi tink some people got a likkle glimpse inna di inner workings a di ting, saw people at dem lowest and highest and formed their opinion on the truth or the lack thereof because I must admit things were not as pellucid as I would've hoped!

Yes mi love, if a even dat Manatt teach mi new word! But wah me woulda like fi know is how all a dis gonna affect di balance sheet between we an' di IMF? We haffi go pay dem back dem money caw unnu know dem no play wid people so mi waa know how dat a go go!

Speaking of repaying loan, why some nasty teefing people no like pay back people dem money when dem barrow it?! Some a dem bring dem distress and dem troubles to yuh in earnest and yuh oblige dem an' len dem yuh money an' when yuh fi get it back a pure problem! Sum a dem pretend like dem no owe yuh, some a dem kill yuh wid excuse and sumtime yuh can tell seh di excuse a lie an' yuh haffi a wonda if EEDIAT mark pon yuh forehead why dem a tell yuh di tings dem an tink yuh a go believe!

principle is principle

Some a di dutty one dem buss big malice pon yuh and walk an' talk a bag a ting how yuh a pressure dem fi yuh money fi get sympathy from people when nutten no go so. To me, even if yuh a pressure dem fi yuh money a fi yuh own especially when dem naa gi yuh no good argument bout your own! Naa seh fi scandal people if dem owe yuh a likkle ting, but whether big or small, principle is principle. Dem owe yuh an' everyday dem a spen' an' buy new tings. If is not a shoes, is a bag or some hype chat a mek bout wah dem a buy.

People no fi watch people bizniz but if dem owe yuh one haffi tek it in consideration! Some a dem owe yuh an' still a mine man a throw one-eye serpent pardna an' naah get no draw! Smaddy owe mi fi two year now an' everytime she see mi she a ask mi how tings or waa gwaan..to how mi ignarant fi har enuh mi jus leave caw if mi start a pure weeping an' mourn! She come to mi meek an' mi neva hesitate fi lend har and now she a gwaan like she no memba seh she owe mi...like she tink it squitz out!

There is no problem fi borrow or owe cause everybody need a likkle help sometime but people mustn't tek people kindness and throw it inna dem face. Nuff time when people lend is a sacrifice dem mek fi dweet go inna some money weh dem have fi do someting else fi help yuh outta problem.

If the terms of repayment can't be met both parties must sit down and talk an' work out an amicable way fi sort it out but it can't be dat dat di one who borrow a gwaan high an' mighty.

Some bad mind one will tink dem can owe people indefinitely caw dem tink smaddy 'have it' but whether they do or not, people have plans and use fi dem money if a even fi lend smaddy else like how dem help you. Wrong cannot be right and people haffi operate wid integrity and dignity. Nobody no waa get tie out like goat plus disrespect pon top a it fi something that's rightfully theirs. If a one don't like pay back den DON'T BORROW!

You can reach me at Misskitty@gleanerjm.com.