Tambareen Nation an Mix Up an Blenda crew big up unu self to di max. Mi deh ya pon di gully side a chill an buil. Everyting jiggy, everything plug een, an light nuh gaan. Big up Calabar, weh mus lock dung Champs. Mi nuh know a whap'm to some KC crebeh, weh a guh try a ting. An Wolmer's naa win again! C-Bar to di flippin worrrllll!!!

Anywayz, mix up time:

Hot Bwoy Tief

Mix up big up to di hot bike bwoy weh a look dis girl fram long time. Di girl decide fi stawt gi him some talk an one ting lead to anoda. One day shi decide fi carry him a har yaad guh dash out di ting pon him. Afta dem done duh di tings dem, dem did drop a sleep. Wen di girl wake up shi nuh see him inna di bed an stawt get up fi guh look fi him. Wen shi a get up shi lik ova something offa har dressa and same time shi hear some sound and foot a run. By shi reach har living room shi see har front door open an di bwoy a stawt him bike an a say him have an emergency an haffi leave immediately, den him jus lef suh. Shi did find it strange an guh check har whole house fi mek sure nuttin nuh missing, but everything was in place.

Next mawning shi find some change bout di place an decide fi guh put dem inna har saving pan, just like shi always duh. But lo an behold!.yes! Yuh guess right!Di saving pan missing! Di dutty, hot an hype bike bwoy tief di girl saving pan wid har silva dem!!

Puppa Jeeezas!! Hot bwoy can a tief saving pan??!! What a bwoy wicked an cayliss! How gyal fi bring yuh a har place, dash out di ting gi yuh, an yuh tief har saving pan??!! Noooo sah! Da bwoy deh a luuu like wow! DUTTY NASTY TIEFING BIKE BWOY, BRING BACK DI GIRL SAVING PAN WID DI SILVA DEM!!! Bad blessing gwine falla him. Ole nastiness. Cho! (but a hope him neva did tink seh him did haffi tief di saving pan because har sort out did pap dung suh bad.

Bareface Bed Tief

Raga big up the gyal from Liguanea weh go borrow bed bottom fram a girl a Seaview and wen the girl come back fi har bed bottom shi slam har door and lock har window and tell the girl "ure luddy!!"

She's a damn tief! Shi fi gi back di girl har bed! Jah know! Yuh have some people wen dem a borrow fram yuh dem mout sweet laka wa. Dem all have a style weh dem a tell yuh exactly wen dem a guh get a ting which will allow dem fi pay yuh back pon a exact date. Den wen di date come yuh cyaan find dem! Yuh coulda call dem phone till yuh weak dem naa ansa. Dem stawt hide yuh out. Den some a dem bright enuff fi all stawt gi yuh attitude bout yuh a gwaan like dem a tief an if dem did know say a suh yuh woulda gwaan dem wouldn't borrow di money from yuh - like dem did duh yuh a favour wen dem did borrow di money from yuh. Wrenk! But di one dem weh really bun mi a di one dem weh always a say "den yuh really waan back dat?" Of course mi waan back mi tings!! A LEND mi did LEND yuh!! Damn tief dem!

Reach Ragashanti at mixupraga@gmail.com or PO Box 5866, Liguanea, PO, Kingston 6.