Even though mi age tek time a slide weh offa calenda, mi enjoy mi birthday to di max! When dem special time deh come roun and how people act an treat yuh speaks volumes to how yuh a live wid people an mi happy fi seh based pon di feedback, mi a live good!

Thanks fi all di prayers, di big-up and di love! Really nice to feel appreciated. Some people always try fi run eeen wid dem negativity fi try upset di calm but mi a one woman wah nuh response fi dutty people caw if yuh falla dem yuh go a yuh bed before nite come dung and if yuh mek dem draw yuh out God cross yuh offa him heaven list! Chu dem life miserable dem a look company an mi naa pay dem mine! Nuff a dem when dem sad, ugly an hungry a so dem love mek mischieve all di while but wid all a dat who God bless no man curse an if him be fi yuh who can be against yuh? Get thee behind me, Satan!

It look like seh good man short bad ... it come een like dem gone pon strike! Some a di one dem wah out deh dont even know di meaning of good much less man! A nice man fi mek we feel nice, do some rose-mantic tings and not just when him a look yuh. A man weh caring, respectful, loyal and no feel di need fi spread himself all ova an one who naa go invest di whole a him money inna hairy-bank!

A nuff young girl mi know a look man and is a hell-eva praglem caw none no too deh! When yuh do find dem they are much older, married and have children which mean seh by default yuh relegated to matey instantly! Some girl might no mine di mate status an it fit sum people but a wah mi cyaa manage! Mi feel to seh mi cyaa badda be second to sum gal who cyaa even walk inna mi yaad slippas an fair is fair if she did deh deh first a she fi get first preference but den again it all depends pon if a she di man waant! Woooiiiee!!

dutty wata

Mi ova hear a roots man a try sell a big man sum roots and di man neva want it. Him proceed fi cuss di man seh him a gwaan like him no 'hook' an a gwaan pon di man. Di big man jus' class him nastiness an tell him seh him no waa none a him dutty wata caw him no waa stay too long and him woman happy wid him five minutes! Wedda or not a true, him jus tek him 'dutty wata' an move right along. But dat mek mi start tink bout sum man dese days. Nuff a di young bwoy dem no firm caw dem naah eat right! Pun intended. Dem naah drink no cornmeal porridge, oats an eat dumpling yam an banana! Sumtime yuh see dem a bay bun an cheese an bag juice dem a drink an Fabbi Dolly did dun seh "man no drink bag juice pon base"!

Sum a di young bwoy dem cyaa match di big man dem who tek care a demself and have dem tings togedda. Sum big man smell like tiger balm, yes, but yuh have nuff out deh wah care demself and well sort out. All di young bwoy dem interested inna a Clarks an cake soap an naa memba seh dem body need nurishment! Nuff a dem naah eat vegetable, no steamas wid crackers an okra, no beef soup and all dese tings. Nuff a di young bwoy dem wata dung! Dem haffi party seven days a week and smoke and drink from sunrise to sunset! Dem naa res properly, so when yuh look inna sum 20-odd year old bwoy face him look like him a 1,000 caw him naa care himself! Nuff a dem want a bag a girl an think dem entitled to it caw dem young an dah ting deh an hungry belly no gree!

A person's age is important to a point caw if a man dun live out him life already wat more can he offer apart from money? Money sweet yes, an from yuh seh money a most woman name dat but it is still not all. Mi waa know a weh di good, clean, single man dem deh caw mi know di woman dem waa know unnu. Wedda yaad or abroad if we no book fi it we will come look fi it! It is very important to take care of one's self. A one body yuh have an one life to live. Everybady ago get ole but it is important to age like fine wine and not like milk! Big up all a di man dem weh a tek care a demself caw it will mean seh unnu know how fi care a woman!

misskitty@gleanerjm.com.