When Dennis Brown did seh di worl is in trouble, mi can bet him neva envision so much trial and crasses all ova di worl'! So much trouble in di worl yah now an' it look like it a get from worse to wussara! Jus when yuh tink yuh have a handle pon tings and yuh get ova one hurdle there comes another - is like we a Melanie Walker cause fi survival we jus haffi a jump so!

My prayers an' condolences go out to all the people inna Japan who really a go chu a tumultuous period. When mi wake up and see how di tsunami jus' a pick up house, car, boat and truck like toys an' a fling dem round, mi realise that after all is said an' done what is really man? When modda nature strike we become so insignificant caw we cyaa stop waa gwaan til she ready. It was really heartbreaking fi see di wata jus' sweep weh everyting inna it path an' di wata a travel at di speed of a jet mi know if a did Jamaica we goose cook!

Sum people no seem fi understan' di impact weh di tsunami have pon di worl but even though we tink Japan deh so far it will affect we in di grand scheme of tings. Japan a di third largest economy inna di worl' which mean seh a nuff resources wah did earmark fi help di Caribbean haffi go put deh so fi help rebuil'. Japan is a large consumer of reggae music an' coffee so is a next market dat get lick. Also tourism and not to figet, a chu dem an' Singapore an' Taiwan an' so why nuff people coulda able fi afford car.

Although nuff a we neva go deh yet or speak dem language, our motto say it best "Out of many, One people". All di prayer warrior dem haffi a work ova time yah now caw we need coverage from di evil nasty force dem wah a try consume we mind so we no have no time fi memba or pay attention to di Most High. In di midst of it all when we a pray fi Japan it look like seh a special kind haffi go do fi Jamaica caw di country deh pon a destructive path!

bangarang weh a gwaan a Libya

In all di bangarang weh a gwaan a Libya, Tunisia an' Egypt weh people a fight fi freedom an' progress, sum people deh yah fight an' kill off one a nedda fi curtail freedom! More time when mi listen di news mi haffi wonda a wah kinda crasses deh pon we so mek we tan so?! We have so much to be thankful for, so many tings to be proud of, yet nuff a we no appreciate it and instead a being grateful we take tings fi granted. It no pretty outta worl' deh and instead mash up we likkle island we haffi do sum intervention fi buil' it back. Not only di tourist part dem fi buil' up an' look nice and when dem come we showcase di bes' a weself, but we need to give ourself di bes' a weself!

All di devastation weh a gwaan a Japan dem seh there has been no report of looting so far...well mi know a couldn't weh dat! Caw if a did eva sumweh else dat, dem teef off all di white offa di rice an' di milk outta di coffee! Mi haffi wonda if when my granny an' modda did a grow up if di time did stressful so?

Everyday yuh wake if is not one ting is another. Some people a seh a end time now so we jus' haffi look up fi redemption caw di bible a fulfil while some a seh a jus natural disaster and Japan and elsewhere will bounce back. It almost come in like seh dem need fi change di age of who dem call a senior citizen caw to how di stress level high all 20 an' 30 year old a have grey hair! Sas crise have mercy pon we!

Life is a beautiful gift and we cyaa be selfish and jus tink bout weself. We must be able to extend ourselves to others because no man is an island and we never know when disaster may strike at our door. Jamaica need fi do some house cleaning caw God no like ugly and di good an' di bad a go get crush inna di rush if di folly no clean up...aye yah yeye!

Reach me at misskitty@gleanerjm.com