Mavado - Contributed

WHA REALLY HAPPENED?

Massive, Mavado go one show in Canada ova di weekend and di people dem get cross like one pot a torment bees when dem see 4 o'clock almost come an' no Vado. People start tweet an' cuss say from 11 o'clock dem hear say him a forwud and all when day soon light him still cyaan reach. A late inna di hours di promoter tell di crowd say Vado stuck ina snow and a dat a cause di delay. But really though, me doubt if him did lef him hotel from 10 o'clock di night before it wuda tek him six hours fi try reach club. If a dat happen, dat a neva one delay, dat was a RESCUE MISSION! We like how yuh ting a gwaan ya now. Yuh nuh ina no drama and yuh song dem start have nuff body and substance, so please nuh badda spoil it a mek people say yuh unprofessional an naw turn up early. Nuh badda. We need all di good artiste dem a represent we internationally, cause dem few ya now.

WELCOME HOME, DRAKE

Drake - File

What a way Drake tek Jamaica as him second yard. We like it! Him come Jamaica an' deh Portland again. Mi guess a so him manage fi hol' a medz an' mek di hits. And dis time mi hear half a di entertainment fraternity gone dung deh go stalk di man. Why? Like di man did say him waah do song wid dem. Some a unoo need fi spen' more time inna di studio an' mek decent song. Di man did tell unoo him waah carry no dead-weight?

What a gwaan people? Mi hope unoo alright. A pure joke mi get deh week yah, Mi naw go lie. Mek we dive inna di suss right away! Link me pon hotgalcherry@hotmail.com OR www.twitter.com/STAR_SUSS

OR www.facebook.com/starsuss OR TEXT (mi naw ansah NO call) 382-2187.

TOYA-A-WHATTA?

Toya? Nominated for Best Female Artiste of the Year? EME's? People, need I really say more?falls to floor choking wid laughter

MARTINA WHO? ICON-A-WHATTA?

Toya - Contributed

People talk di truth now. Mi get deh text ya. "Martina a expect a baby girl for Icon from J.O.P. ina NYC, so wha a go happen wid her musical career now? Mi hear say is long time now di two a dem deh." Talk di truth wah God inna Heaven love, a which smaddy dem yah? Wah yuh mean wah go happen wid her musical "career"? Di same ting wah did a happen before. Not a ting. Mi nuh undastan' wah deh happen. Di music industry need fi formalise man. Everybody a artiste and have "musical career". Lawd.

ENNIS, WAS DAT A JOKE?

Promoter Dexton Ennis - Contributed

Mi need fi know wah di Follow Di Arrow promoter really come pon mi TV screen lass week come say. Him blame STAR fi him show mash up? A muss a joke! What a WAY yuh neva have a problem when di story publish, but a when yuh show mash up because ah fi unoo owna madness yuh a blame we? MOVE OVER ILLUMINATI, THE STAR AND THEIR MIND-CONTROL IS HERE! Den now Killa come on right afta an' a say people did a plan fi bokkle him from before when him did go one show ina Ochi cause dem neva like di bleachin argument. Oonu need fi get oonu story straight before unoo go pon TV ok. Is eida a we go roun an hypnotise di people and put bokkle ina dem hand fi fling, or odda people did plan it from before. Write dung di story dem inna oonu HAND MIGGLE or TATTOO it ina one a di camera man dem forehead ina bright red so oonu can read and talk same time an keep unoo story straight.

THE NEW QUAD? IS IT A CLASH?

Why di new Quad advert dem hafi a disrespect odda company and establishment ina di advert dem so? Corey and Kartel, why unoo hafi a carry di same mentality go ovah next door. Lawd man. It not even open yet an' mi fraid.cringes

Massive, latah. By di way the Beenie, Fambo and Busta Rhymes, Rum and Red Bull remix a shell dung foreign. Big up oonu self.