Lisa Hyper - File

BYE, BYE TONY GALLIMORE

But Tony look how yuh jus gone offa di station doh eeh? Hush yaw! Cause me did actually enjoy yuh playin and vibes still, naw lie. But a jus one a dem ting deh. On to bigga an' betta. And di schoolaz segment dem replace it wid, wid some UWI students, why tho? A free dem go do it for? A dats why? A who really lef ova deh station deh now, and me need fi know a who exactly dem a try target inna dem listenership. Mi confused!

SMADDY! A DI WRONG NUMBAH!

And hello the smaddy who a call me endlessly and a send message to 'Shelly' bout 'Courtney', mi dear yuh nuh realize a di wrong numba? And den, look who yuh really a tek mistake a send yuh bizniz to nuh? ME! If dat a nuh joke, mi nuh know wha fi say again!

Latah massive!

What a gwaan people. Mi hope everyting criss wid oonu. Dem say space short, so mi jus go hurry up an get into it. Memba, every Saturday night di STAR put on summen name STARlight inna di club. A upstairs Burger King, New Kingston 10pm-2am. Coppershot big up oonu self, oonu Lunatics Tuesdays up a di club sell right off! So we up deh again tomorrow night.

Link me pon hotgalcherry@hotmail.com OR www.twitter.com/hotgalcherry OR www.facebook.com/starsuss OR TEXT (mi naw ansah NO call) 382-2187.

THE BLOWING SAGA WITH KIPRICH AND LISA HYPE

KipRich - File

People, smaddy send me a KipRich and Lisa Hype song name Blow Blow. People! I laugh till me nearly CHOKE. Big up oonuself di concept mad. Kippo a tell Lisa Hype fi blow, blow, blow baby girl blow, and den yuh hear Lisa chip een literally a blow air. No sah, it funny.

And look here now Lisa, mi see yuh people a send out say you wanna put all your issues wid Killa aside now. Why yuh neva tink bout dat when yuh ovah Gaza? Rodney neva do yuh nuttn. A you did ova deh wid Addi and tek side and start wear and tear di man name like yuh hear say a Rodney 'Ole Clawt' Pryce him name. Now dat yuh inna di real worl' yuh a cry peace. Him neva declare war at first, a did you. Why artiste must stay so? If a next man inna di industry nuh do yuh nuttn, don't tek no side. Simple as dat.

FINALLY, A NON-BLEACHER

Vybz Kartel - Winston Sill

Bwoy Kartel, di white baby wha Mandy have a fi yuh? Me know she did have one, but me a try figure out if a di same one a fi yuh, or she have a new one which is yours. Eida way, if a fi yuh, congrats. What a waaay yuh neva stop so till yuh get a real white smaddy inna di family.

By di way, mi honestly nuh tink yuh mus get no lighter. You have proven your point, although to be frank me still nuh too sure wha di point be. But Lawd, done now fren. Unless yuh a try look like Harry Potter Invisible Cloak, yuh can put di bleachin pon pause. It start look strange...er.

PHAT KHAT? REALLY?

People, mi nuh waah tell a lie, but I cudda swear mi hear dem call Phat Khat name pon Nationwide wah day yah. Mi neva listen too long fi hear if is an advert or if dem did a advertise one segment wid him. Surely, him nuh wuk deh?! Mi wudda shock beyond human comprehension! First of all mi can neva, and will neva get use to a man name PHAT KHAT. Him know wha dat mean? Me neva dream of di day mi wudda hear dat name pon local airwaves again.