Bless up unu self mi Tambareen Fambily an mi Mix Up an Blenda crew. No hitching roun ere! Straight to di mix-up dem mi seh!

Fren Breed fi Fren Man

Hi Raga. I have this girlfrend that had told my man she pregnant but also told him not to tell mi cause it belong to mi brother. Raga that same nite my brother call mi and ask mi if a true, mi in turn now go say it to mi man and Raga to my surprise him face say him did know bout it. It escalate into an argument where mi upset wid him a keep har secret from mi ... ( wat them have in common). Anyway, she got har belly a come and to my foolishness and idiotic self, mi living inna house wid mi man, four kids and neva know say a mi man did breed har! Him nuh know and she tek the belly go give mi brother! Raga after pickney born everything reveal, and wen mi man papers come through and him come USA fi file fi him family, that a wen she let it out say a really him a the dad. Mi simply tek mi kids and wen mi reach America mi just look a man and tek wey myself. Now hell reach him and him nuh stop call and cry. Mi number change, address change and now mi hear say him reach back a Jamaica living wid har. Even mi brother deh yah now a di US wid mi and people a say we wicked to the child, wen a the man cruel. Give advice Raga. Love ur show.

Hear mi ... right ya now yuh nuh need dat deh so-called fren roun yuh. Imagine, she claim to be yuh fren an guh tek yuh man behind yuh back, trick him seh a your bredda breed har (probably cause shi neva want yuh man tell har fi get abortion), den a guh reveal say a yuh man breed har wen time come fi him file fi him family fi go di US. Both she and yuh man cold! Mi nuh know a wa really a gwaan nowadays, but a whole heap a man a tek dem woman fren and a whole heap a gyal a tek dem fren man. Di ting a get wild yow! Ladies, wen unu have a good man, unu nuh fi too loud up di goodness to unu fren dem, cause di same fren dem wi plot an scheme an neatly tief yuh man.

Tell Lie pon di Belly

Raga big up the gyal inna Bronx, NY weh go Jacobi Hospital go forge pregnancy paper bout she one month pregnant fi mi babyfadda. She all a raffle har last pickney cause shi nuh know the puppa. Raga she call me inna December seh she one months preggo and now she a seh she one month pregnant. Raga the gyal even a threaten bout when she see mi weh she ago do to mi, Raga a da day deh she woulda wish fi har mumma neva bring har inna diss world. Raga mi baby fadda sort out shot, so dats y she a run him dung. And when mi and him mash up him go lend har him tings and she a teck set, and all get bipolar from him sort out. So big up the raffle Bronx belly gyal weh a keep on a seh me babyfadda tell har seh me always be number one and dat me sort out shot, a jus mi attitude him cah stand. So she need fi go play inna traffic and kick rocks.

Yours truly baddadanflawless.

A weh dis a gwaan up inna di Bronx?! Big up yuh baby fada wid di bipolar sort-out! A gyal get him wuk an it a mad har, cause now shi want it so much dat a straight bipolar depression a reach har! Mawd! But wen shi gaan a hospital gaan forge documents bout shi pregnant fi yuh babyfada, an a walk an a tell lie pon har belly, shi a tek di ting pon a sick level yow! Yuh babyfada wrong too, but di trute is dat some gyal neva waan find a man fi demself, dem ongle want man weh oda woman already have. Nuff a dem fi go spread out inna hog pen 'cause a ongle dat dem good fa.

Reach ragashanti at mixup raga@gmail.com or PO Box 5866, Liguanea PO, Kingston 6.