Mix-up big up to all a mi Tambareen Nation linky-linky an mi Mix-up an Blenda Fambily. No hitching, a straight to di mix up dem mi say:

Hot Matey inna South Africa

Wha gwan Raga? Mi seh mi live a South Africa fi six years now, and when mi come a yaad last year a di fuss time I hear yuh show, mi seh now mi glue to mi radio an mi computer. Anyway, mi have a likkle man ova ya whey 'taken' but true mi young and fresh mi a mad him. Suh mi leff fi three weeks and next thing mi know di man call and seh him deh a Norman Manley airport. Fi tell yuh di truth, mi did vex cuz mi did wha sum local sort out. Afta mi come back a South Africa, di ooman find out seh him neva go fi no conference but did guh luk fi him ada ooman (a mi dat).Raga a pure things, di ooman start search everything. Everytime we go outa country shi know, and wi travel nuff. Everytime him transfer money, shi know, all when mi a get sort out shi a call. Suh mi seh, no man, dis affi tap! Suh mi call har and ask har "what you want to know cuz mi tiad a yuh now". Shi nearly dead to rahtid, but a pure problem when di man go home. Mi end up change mi phone number. Wha come next was shock to mi cuz, to rahtid, di ooman a sue mi fi deh wid har husband.Well, till wi go a court mi still a get mi 'sort out'.

Wat a piece a prekeh! Yuh nuh easy eeh, lef all di way fram Jamaica gawn a South Africa gaan tief di woman husband. An it look like yuh a dash it out pon him wicked das him all fallow yuh fram South Africa cum a Jamaica cause him cyan do widout yuh. It look like a you have di good-good falla-back-a-mi. Mad!!

But mi nuh tink yuh shoulda did call di wife. If yuh know seh yuh inna matey status, an a dat yuh waan, weh guh call di wife fa? An now yuh put di man inna one bag a drama.

As fi di wife a sue yuh, they do have laws in some countries that allow a wife fi sue har matey (some states in di US call it di Alienation of Affection Law). Yuh best defence is fi say yuh neva know nuttin bout di wife. Therefore, yuh betta stop saal up di wife an a leave evidence (phone records) seh yuh know bout har, (go see yuh inna matey court, lol).

Hot an Hungry Gyal

Raga big up di gal dem a Old Harbour Road weh a boast bout dem money-machine man who a gi dem eight gran a fortnight, but still a walk an a beg $20, sugar an seasoning.

A wa do some 20 dolla gyal a walk an a hype?! A how some gyal a hype seh dem man a real money-machine top man an a ongle four gran a week dem a get?! Some gyal a hypy-hypy an dem meat nuh season!! Some gyal a hypeesha an dem lemonade nuh sweeten! Nuh sugar nuh de deeeeehhhhh!!! Raaaaaeeeeeeee!!!!

Reach Ragashanti at mixupraga@gmail.com or PO Box 5866, Liguanea PO, Kingston 6.