ZJ Rush

What a gwaan people?

Happy New Year to everybody. Big up oonuself and tanks fi always a support di column and di vibes. A mad sinting again fi di new year. Link me pon

hotgalcherry@hotmail.com or www.twitter.com/hotgalcherry or www.facebook.com/starsuss OR TEXT (mi naw ansah NO call) 382-2187.

WHY YUH A HIDE HE/SHE/IT?

Oonu can tell me why di promoter fi one certain concert a hide him gay son/daughter/whateva gender di smaddy be yah now, from we? When me hear me laugh till me nearly drop offa me seat. People, di man son all deh a foreign, gone as far as fi a wear skirt and cream hair an' pure sinting. Wha mek me laugh is WHO di promoter be. Di way how we shock dung yah words cannot express it people! Mi neckstring. Lawd, no sah.

AH MUSS JOKE YAW MAN

Smaddy can please tell me how and why Rosie gone a di people dem party wha day and gone fight? My girl yuh need fi do away wid such tings ya now man. Yuh will mek people fraid fi associate wid yuh cause dem can neva tell wha kinda saga yuh go stir up. Some people walk wid shadow, yuh walk wid crosses an' drama. A wha so. Lawd.

ROMEICH AND FIWI CHOICE GIRL?

Romeich Major

People, due to how me nuh too sure, me haffi say wha mi a say and pose it as a question. Romeich, yuh and di coolie girl from Fiwi Choice deh or unu related? Amiita or whateva she name? Becawz di odda day mi a look tru some party picture and me a say me see oonu out quite a few time. Me fass. So me waah know wha deh happen.

PEOPLE TALK DI TRUTH NOW ...

People, mi nuh have nutten personal gainst ZJ Rush enuh, but me just cyaan tek one more party wid him. Imagine, aftah people spend dem good money go Yush, dem mek dis man play two time. Not one, but two time. And in true Rush style him send home di audience. Mi jus sick a it man. Him come een like Jigsy when Bembe used to keep. From yuh see Jigsy touch di turntables yuh know a time fi yuh start head fi yuh yawd. Yuh need fi chat LESS a dat it come dung to.

SEAN PAUL A MARRIED?

Sean Paul and Jodi 'Jinx' Stewart.

People, it look like Sean Paul finally go married. People a say him allegedly propose to him long-time girlfren, Jinx pon New Year's Eve and she accept. Mi did find di last part hilarious. She nuh muss accept? To how she siddung fi years a wait fi di ring, she cudda mad fi pause, muchless say no? If sinting go so though, congrats to oonu.

Latah massive. Tek care.