Baxside ya now! Bragadap brap! Brap! Brap! Bless up to mi Mix Up an Blenda Fambily an all linky-linky inna di Tambareen Nation.

Mi naa hitch, a mix-up mi seh straight. Mix-up big-up to di bredda weh jus start talk to a catty, an di second time him meet har him run go gi har one a him credit card fi keep fi shi use wen shi want.

Di gyal nuh do nuttin more dan go tun Flossing Queen! Mi hear seh shi buy till she tun eediat. Di gyal buy fram grocery right up to furniture. Yeah! Shi go a one furniture store an buy propa-propa bed an all dese tings. Shi all carry har girl fren dem go shopping (a one a dem gi mi di link). An wen dem a shop, di gyal a brag seh di man not even get a kiss or even a rub offa har leg yet. A hundreds of thousands of dollars di gyal spen. Mi all hear seh di credit card a one big-time farin credit card wid a huge limit. Di gyal jus bruk weh wid di card.

Hear ya now, afta di gyal bruk out wid di card, di man nuh start cuss har seh shi wicked an unreasonable. Him dawb har up how a people like she mek it bad fi oda woman. Di way how him rinse har up yuh woulda tink seh she a di wickedest smaddy pon earth.

But people, as far as mi concern, di man is a damn eediat! An him deserve everyting weh reach him. Mi naa seh di gyal did nice, cause she certainly was not. In fact di gyal unreasonable fi true, an damn wicked. But a still di man fault. How di baxside yuh fi jus meet woman an gawn gi har yuh credit card di second time yuh meet har? Him is a damn eediat! Ole kunu munu.

Den hear ya too nuh, apparently wen di gyal did a rinse out di card di bank call di man an seh dem temporarily block di card due to unusual activity wid di spending. Supposedly di eediat man tell di bank seh dem no fi worry bout it and that all di spending weh deh pon di card him know bout it. Den him tell di bank fi unblock di card. Him den call di girl an tell har weh happen wid di bank and also informed her that she could start use di card again to buy weh she want. Di gyal jus promptly accept di green light an run tru di card again.

People, di fu-fool ting inna all a dis is dat di bredda doan even did waan di bank tell him di charges before him tell dem fi unblock di card. One smaddy can so fool-fool? Noooo sah!

Den afta all dat, him a move to di catty fi get likkle sort out. Mi hear seh shi nuh stop go roun him an mek sure seh him no get nuttin. Mi no wrang har. Cause even if shi did waan gi him a likkle piece, di gyal mussi did a tink seh she could not in good conscience mek such an idiot get har sinting. It woulda be a disrespek to har nookie fi mek dat deh eediat get likkle a di sinting. A man lakka him mek it bad fi man like me. Cause afta him pwile di woman dem so, no wonda wen man a look dem all yuh can hear is dat dem waan house an lan before dem sen on.

Dutty eediat bwoy, stap gi woman yuh credit card fi rinse di second time yuh meet dem. Yuh ole zutupek. Jah know star, mi no know a whapn to some fool. Dem mek man shame yow.

Mi a cut ya now, link mi back next week Tuesday. Tek cyere a unu-self yow.

Reach Ragashanti the King of mix-up at mixupraga@gmail.com or PO Box 5866, Liguanea PO, Kingston 6.

Shi all carry har girl fren dem go shopping (a one a dem gi mi di link). An wen dem a shop, di gyal a brag seh di man not even get a kiss or even a rub offa har leg yet.