Jackass sey de worl' no level. Jackass sey wat a reng kreng a gwaan wid dis ya visa sittin.

People people whe ave oonu visa fe go Merica oonu hol it tight an hide e so nobady cyaa tek e whey! People, people whe a apply fe visa, haks de people dem wan question when oonu go inna de hintaview - "sar (ar mam), if it cancel before de time whe deh pan it hup, me wi get back some a me money? Cause hit no cheap yu now sar (or mam).

No man, the world not level at all in this giveth and taketh away visa sittin whe Uncle Sam a gwaan wid. We nah go speculate pan de cause. No, cause we har not de govament, farrin law firm or the vice-president. We nah go mount no case fe happeal fe de man dem whe dem visa get tek whe, cause we no know oh heach case go.

reimbursement

But we can stan up far what is clear and obviously unlevel (after all, we har Jackass) and it is clear and obviously unlevel that if you pay fe sittin an' de smaddy whe yu buy it fram tek it back yu fe get back all ar part a yu money. Simple ting. Is like dis. You buy a piece a furnicha pon higher (and that is not a slip, cause it is seriously higher) purchase, yu cyaa kip up wid de payment. De people dem come back fe dem sitin, but yu cyaa bawl becausen yu get some use fe de money whey u done pay. If is a dressa, yu did cotch picktha frame pan it an look good pan it. If a stove yu did get some good cookin outta hit. If a counch yu did get some good siddung while yu watch Fox Sports, all crack some ease inna it an drop fries between de cshan dem.

If a bed. well, Jackass is a stan' up man where dat is cancern, but im know im no affi spell it out fe oonu.

drawbacks

An de fac' is yu can always get one nex' couch, one nex fridge, one nex' dinin' table. But if a visa, yu cyaa get no more. (Unless yu flex it like Pelpa an Flippa, but dese watery routes to de Promise Lan' does have dem drawbacks, as we ave clearly seen.) An' even if yu did travel pan it before it get tek whe, de previous trip dem come een like nutten to de one demy yu did a look forward to.

So no man, people fe get back some ar part a dem money if an wen dem visa get tek whe (ar revoke, as they say when the don't want it to look so bad). An is not jus' de fee, plus de DHL money. Is de money fe de good clothes whe oonu buy fe himpress de hintaviewa. Is de transport cos'. Is de parkin' fee an cellphone holdin' fee whey u pay de hustla dem. Is de money fe de special breakfas' yu did buy fe fartify yusself in case yu fartify inna be hintaview. Is de money fe de guard whe go St Thomas as St Mary fe seal up, fe guarantee sey yu get de visa. Is de special collection whe trow a church fe buil up yu bank account.

A no penny money!

Jackass sey de worl' no level. Jackass sey some deejay haffi go check LA Lewis pan dis travel pan driva's licence sittin!