Macka Diamond

1,2,3 testin it; yehaaah! What a gwaan massive? Everyting criss? Mi a tell yuh say it was a stressful week but yuh juss haffi gwaan trod. Nadine T; Shauna-Kaye R.; Donovan T; Marvin W.; Luke L.; Dj Janoih; Shekara M.; Carol D.; Nardia B.; Serani (Billboard Magazine and all dese tings) and di ress ah oonu bless up oonuself! Suss time! Link me pon hotgalcherry@hotmail.com.

BIG MAN HOUSE

Mi refuse fi believe say summen can go so. How di real big man only go ah him yard one time fi di month? How ah him one live up a di house wha dem get? How di wife live a di previous house by herself? Mi nuh know; dat nuh seem right. Sort out oonu ting man, cause ah oonu fi a set example fi di ress a people dem and mi a say it juss look a way. Wah really deh gwaan wid oonu?

LENA BRITISH HAIR LINE?

Promoter Lena British

Ah wha di backfoot a gwaan? Lena yuh have hair line? Mi nuh know wha mi fi say. Congratulations babes, cause yuh weave dem eva sell off! Di horse dem a plead fi mercy, but yuh ting evah sew and glue een proppa! Mi understand say a London yuh gone fi seal off yuh hair line deal, but whe di hair a go distribute? Inna top hair salon or wholesale? Inna London and Jamaica alone or Caribbean and USA? Wha di exact name ah di hair line? Mi hope ah nuh di hair dem wha as soon as yuh put dem een and a comb tru, di whole a di hair strand dem start tear out! Mi nuh suppose fi a walk and shed like animal wid bald spot inna mi weave. But mi proud babes, yuh a real business woman.

WHAT'S DI SECRET?

Vybz Kartel

Mi say yuh see oonu two crosses troublemaker, mi not even go call oonu name! But oonu know oonuself. Mi laugh so till mi hungry wha day yah when mi hear bout deh conversation yah. Now massive aftah mi tell oonu di joke it a go obvious why I are cannot tell oonu who di two people dem who ah laugh and come back come tell me. On di topic of distribution, Addi, whe exactly wi can find Vybz Rum? Di wicked people dem a run joke say it are obvious dat we are cannot know whe fi find di liquor unless we meet yuh and do one secret handshake! Ah you sing bout 33 degrees of whatever inna yuh song, so mi a assume dats how deh joke deh come bout. Den dem a say maybe we haffi have one tattoo pon wi neck fi show allegiance, den wi can know whe fi find di secret location and distributor fi di liquor. But fun and joke aside, whe exactly we can find di condom and di liquor dat caters to Dancehall, apart from di launch yuh did have fi di liquor? If yuh nuh waah loud it up, email me and mek mi know whe di secret stash deh.

MI WAAH FI KNOW:

1. Nikki naah go back pon Zip? A one veeeerrry long suspension dat deh. Wha really deh gwaan?

2. Ah di real smaddy dem ketch fi Ice murder? Mi really hope so cause dem a move too vicious inna deh country yah and nah pay fi dem crime!

3. What a way Cherine Anderson step up and gone go perform ah Obama inauguration celebration eeh? Mi proud ah har!

4. Macka why in di name of everyting normal and holy yuh go rounah dump-body-road, aka Dunbeholden, fi go celebrate birthday? It sell off an everyting, but next year nuh pull dat, cause most a wi NAW come roun deh!

Cherine Anderson

- File Photos